Alauddin ka Tarbooz

[Tahir]

yaqeeN hai jaaeigi ek rozz jaan Dilli meiN
talaash kart’e huey ek makaan Dilli meiN

tamaam din ke sar’e raah humm thak’e haar’e
shikam meiN choohey uchalt’e they bhook ke maar’e

baRa tha meira shikam, dostoN maiN kya karta
raqam thi jeib meiN kam, dostoN maiN kya karta

chala khareed ke tarbooz soo’e dasht’e haqeer
lagi jo paaoN meiN thokar, saNwar gai taqdeer

gham’e hayaat ki raatoN meiN din nikal aaya
gira jo haath se tarbooz, JIN nikal aaya

adab se bola ke adna ghulaam hooN Saghar*
jo ho sak’e na kisi se wo kaam hooN Saghar*

ishaara ho tO main rukh moRh dooN zamaan’e ka
bana dooN tum ko manager yateem khaan’e ka

mer’e sabab se latifa mushaira ho jaaey
palak jhapakt’e meiN shaayer bhi shaaeira ho jaaey

gunaah o shirk ki raatoN meiN aaftaab miley
ibaadateiN kareiN mulla, tumheiN sawaab miley

agar main chahooN, mulatThi se ras bhari ho jaao
baghair teer chalaa’e Padam Shri ho jaao

main aadmi nahiN, dushman se saaz baaz karooN
agar main chahooN tO ahmaq ko sarfaraaz karooN

jo hukm kij’e tO mUrdey meiN jaan dalwa dooN
maiN ahd’e peeri meiN, beewi jawaan dilwa dooN

bajaaeiN seetiyaaN ab talkhiyaaN zamaan’e ki
yeh pakRho kunjiyaaN qarooN ke khazaan’e ki

nahiN hai dil ki tamanna jahaan dilwa de
main haath joRh ke bola makaan dilwa de

yeh kah ke ghus gaya tarbooz meiN who kaala JIN
ajeeb waqt hai bigRey huey haiN sabke din

yeh sard sard fazaaoN ka gham na saht’e hum
makaaN jo milta tO tarbooz meiN na raht’e hum